ဂျကာတာ၊ ဩဂုတ်-၂၅-၂၀၂၅
မျိုးဆက်(VOM)
အမေရိကန်နဲ့ အင်ဒိုနီးရှားတို့ဟာ ဩဂုတ်လ ၂၅ ရက်နေ့မှာ တပတ်ကျော်ကြာမြင့်မယ့် ပူးတွဲစစ်ရေးလေ့ကျင့်မှုကို မဟာမိတ် ၁၁ နိုင်ငံနဲ့အတူ စတင်နေပါတယ်။
ဒီလေ့ကျင့်မှုဟာ အာရှ-ပစိဖိတ်ဒေသ တည်ငြိမ်ရေးကို သေချာစေဖို့ ရည်ရွယ်ထားတယ်လို့ ဆိုပါတယ်။ နှစ်စဉ်ကျင်းပလေ့ရှိတဲ့ “Super Garuda Shield” စစ်ရေးလေ့ကျင့်မှုတွေကို အင်ဒိုနီးရှားမြို့တော် ဂျကာတာနဲ့ အနောက်ပိုင်းဆူမားတြားကျွန်း၊ ရီယာကျွန်းစုရှိ နေရာများစွာမှာ စက်တင်ဘာလ ၄ ရက်နေ့အထိ ပြုလုပ်မှာဖြစ်ပါတယ်။
အင်ဒိုနီးရှား တပ်ဖွဲ့ဝင် ၄၁၀၀ ကျော်နဲ့ အမေရိကန် တပ်ဖွဲ့ဝင် ၁၃၀၀ ခန့်အပြင် ဩစတြေးလျ၊ ဂျပန်၊ စင်ကာပူ၊ ပြင်သစ်၊ နယူးဇီလန်၊ ဗြိတိန်နဲ့ အခြားမဟာမိတ်နိုင်ငံတွေက တပ်ဖွဲ့ဝင်တွေလည်း ပါဝင်ပါတယ်။
အမေရိကန်နဲ့ ဩစတြေးလျတို့လို မဟာမိတ်နိုင်ငံအချို့ဟာ ပစိဖိတ်ဒေသမှာ တရုတ်ရဲ့ တိုးပွားလာတဲ့ စစ်ရေးလှုပ်ရှားမှုတွေအပေါ် စိုးရိမ်မှုတွေ တိုးပွားလာကြောင်း ထုတ်ဖော်ပြောဆိုခဲ့ပေမယ့်လည်း ယခုလို စစ်ရေးလေ့ကျင့်မှုတွေဟာ တရုတ်ကို ရည်ရွယ်လုပ်ဆောင်တာမဟုတ်ဘူးလို့ အမေရိကန်က ပြောပါတယ်။
စစ်ရေးလေ့ကျင့်မှုအစီအစဉ်မှာ ပူးတွဲစစ်ဆင်ရေးလေ့ကျင့်မှု၊ စစ်ရေးအကြံပေးလေ့ကျင့်မှုများ၊ ဆိုက်ဘာကာကွယ်ရေးလေ့ကျင့်မှုတွေအပြင် လက်နက်အစစ်နဲ့ ပစ်ခတ်လေ့ကျင့်မှုတွေ ပါဝင်ကြောင်း အင်ဒိုနီးရှားစစ်တပ်က ပြောပါတယ်။
အိန္ဒိယ၊ ပါပူအာနယူးဂီနီနဲ့ အရှေ့တီမောနိုင်ငံတို့အပါအဝင် နိုင်ငံအများအပြား ကလည်း ဒီစစ်ရေးလေ့ကျင့်မှုမှာ လေ့လာသူတွေအဖြစ်နဲ့ အဖွဲ့တွေ စေလွှတ်ခဲ့ပါတယ်။ အင်ဒိုနီးရှားနိုင်ငံဟာ အမေရိကန်နဲ့ တရုတ်နိုင်ငံတို့နဲ့ ဆက်ဆံရေးမှာ ကြားနေမူဝါဒါကို ကျင့်သုံးနေပါတယ်။
Ref:CNA
Photo:AFP/AP
